Fugly e Whales, as bandas portuguesas máis en forma do momento

Fugly e Whales acaban de chegar dunha xira por Europa de máis de vinte datas tendo en Lugo a súa única etapa galega, e veñen erixidos como unhas das bandas portuguesas actuais con maior proxección no continente. Cada unha co seu estilo a defender, claro. Pois sempre resulta interesante xuntar dous estilos diferentes, sobre todo se a base é a mesma – o rock. Fugly levan o rock de garaxe pola distorsión do punk mentres Whales o traen para un ambiente electrónico e máis experimental. De primeiras é innegable que conforman un cartel cando menos atractivo. O Club Clavicémbalo foi unha das catro paradas no Estado Español deste Euro Sprint Tour e dende aquí só podemos felicitar a Ho! Gruf por sacar adiante un evento así. É meritorio que a nosa cidade, “na que nunca hai nada“, fose a única casa galega para estes músicos.

A experiencia nos di que a puntualidade non adoita ser o punto forte dos concertos no Clavi, especialmente cando reina un ambiente relaxado e distendido, como era o caso (cando chegamos, un grupo estaba de cháchara e cervexas na porta; o outro, xogando placidamente ao xedrez). Fugly eran os primeiros en sair ao palco, e notábase que a sala ainda non estaba o suficientemente chea como podería ter estado; a pesar diso gañáronse con temas como “Hit a Wall” e “Waste My Time” a aqueles que xa tiñan ganas de moverse. No ecuador do concerto, os de Porto lanzaron unha mensaxe que penetrou con facilidade no público: “We are the millenial shit!“. A partir daquí, a banda arroxaba a súa timidez ao abismo grazas a unha ristra de cancións verdadeiramente efectivas, simpáticas e ben interpretadas.

Con enérxicos concertos que de seguro bateron nos corazóns da Europa e a recente confirmación no festival Paredes de Coura, Fugly son, seguramente, músicos en alza que soben a pasos longos na escada do garaxe portugués.

O outro grupo que os acompaña vén de Leiría e non tocan propiamente punk, mais é un dos grandes talentos emerxentes da escena alternativa lusa. Whales é un poderoso trío de mozos que forman o nexo perfecto entre a electrónica e o indie rock. A min persoalmente remitíronme aos primeiros anos de vida dos británicos Foals e do seu primoxénito Antidotes, coa engádega presenza de máis sintetizadores e teclados.

Desplegaron un repertorio que, como o seu recén estreado disco (que non puiden evitar comprarlles alí; de feito, voaron bastantes copias), ten a capacidade de facer que ninguén permaneza moito tempo cos dous pés no chan. E lograron transmitir con creces esa sensación de festa que esixe o seu directo a pesar do evidente cansancio dunha xira tan longa. Cada tema seu é isto mesmo, unha viaxe, diferente das outras, levándonos por momentos de introspección, encanto nos deixamos invadir polos ritmos atmosféricos, pero tamén polos máis desenfreados. Temas como “How Long” e “Big Pulse Waves” fixeron as delicias da entregada audiencia alí congregada que non parou de disfrutar, bailar e botar durante a hora restante. Tanto é así que houbo ata (outra) invasión de escenario para pechar polo alto aquela boa noita noite de concertos.

Ambas bandas comentaban que se arriscaran con esta tourneé, pero algo lles dixo que tiñan potencial para levar a súa música polo mundo adiante, sentírono así, e están nunha boa altura para facelo. Fugly e mais Whales son dous dos máis prometedores nomes da música independente do noso país veciño. Ide estando atentas, escoitade os seus álbums e se tedes a oportunidade, ide a velos ao vivo. O futuro está aquí.